إلى لارا فابيان ومن يشد على يدها لتأتي ومن يركل ق... لتروح

 إذا بدا لارا تجي، تجي. وإذا بدا ما تجي انشالله عنا ما اجت وعقبال ما تاخد معها نواب المجلس كلن اللي بيعرفوا فرنسي واللي ما بيعرفوا،

وتاخد معها كمان اللي نازلين تنظير علينا وعلى وطنيتنا... ما شفت حدا منكن حرر غصن زيتون ولا دافع عن مظلوم ولا كشف مستور ولا نشر معلوم...

ومابعرف كيف الحكي عن لارا ومارا رح يغني فقير أو يعلم جاهل أو يحرر اسير...

في أولاد عم بتموت بحمص  وفي حريات عم تنتهك بمصر وبتونس وباليمن و بالعراق وبليبيا... و فلسطين هيديك المأساة الكبرى...
بس صوت لارا الرخيم يعلو فوق صوت كل هذه الغوغاء مش هيك؟؟

أما إذا كنتوا من دعاة نحنا ما دخلنا بغيرنا وخلي كل واحد يقلع شوكو بايدو لكن لخبركن إذا كان بعدكن ما بتعرفو، شو بدو يعرفكن فلا معرفة تعلو على معرفة الست لارا،

نحنا يا أشاوس منك إلو كل يوم عم ننسرق من مخلوقات عملناها بشر ورجعنا إنتخبناهن نواب ووزراء...

نحنا عايشين بالعتمي وبنصلي صلاة الغائب وصلاة الإستسقاء  ١٠٠٠ مرة تيجي الضو اللي مندفع حقو فاتورتين...

نحنا المجرم بنعملو مسؤول شي عن زنزانه بسجن روميه وشي عن وزارة وشي عن شعب وشي عن وطن... وإذا ما عملنا مسؤول بنفلتو...

والبريء عنا بنقتلو... بأساليب متميزه أكيد...
يا بنهبط بنايه على راسو، يا بنغطسو بطيارة وإذا راح تيصلي لربو بيلاقي الشيطان لاطيلو...

نحنا بناتنا وخياتنا واماتنا وصحفياتنا ومعلماتنا يا قابضاي منك إلو كل يوم عم بيتعرضوا لتحرشات وبهدلي وإذا ما قالولكن مش لأنو هيدي الإشياء ما عم بتصير بس لأنو انتو ما بدكن تسمعون...

إنتو ما بدكن تسمعوا غير صوتكن وصوت لارا اللي جاي تغني بعيد الحب ببلد إذا تنين حبوا بعضن ما فين يتزوجوا إلا بموافقة أقرع يا لابس عمة يا لابس سنسال...

و إذا ما وافقوا الشباب بدن العشاق يتشحشطوا على جزيرة متر بمتر مش معروف انكنا تركيه ولا يونانيه...

والماساة الأكبر إذا وافقوا لأنو فين يتزوجوا بس ما فين يشتروا بيت ببلدن وإذا اشتروا ما فين يعلموا ولادن...

وانشالله تضل الصحة منيحة لأنو اللي بيمرض بلبنان الموت استرلو وأشرفلو... 

بس أكيد كل هيدا مش مهم...

مش مهم إنو كل الإمم سبقتنا وإنو مستوى العلم عنا إنحدر لمستوى غسيل الدماغ وفصل البنات عن الولاد وفصل العقل عن الجمجمه...

المهم إنو لارا فابيان تجي...

والأهم إنو ما تجي لانو بدنا نسجل موقف إنو يابا نحنا حررنا القدس... و قاطعنا (كلمة قاطعنا هيدي كتير اساسيه إذا بتريدو سجلوها نوت عندكن)

وأهم شي، أهم شي، إنو لارا رح ترجع تجي، رغماً عن كل الأنوف التي قاطعت وانقطعت وهي تجعر وتطالب بكنسلت الحفله،

ولو ما نائب الشعب الأغر تحرك وإسترجع حقوق الشعب المهضومه ما كانت رجعت...

 وطبعاً في كل هذا الجدل البيزنطي السخيف إفادة...

إيه متل ما عم قلكن...

لأن من ورا لارا، أطال الله في أحبالها الصوتيه ورسائلها السلميه،

صرنا نعرف إنو الإرهابي هو اللي  بيقاطع حفله والخاين والعميل هو اللي بيواصل وبيحضر حفله!!!

 يعني شو بدي قلكن: عيب استحوا، مثلاً ؟ بلا هبلكن مش ناقصنا، مثلاً؟

ما فيني غير اني إستشهد (بتصرف) بإحدى روائع الفن الراقي وقول: اللي خلايا دماغو(بدل إمو اللي أن متأكده إنها منو براء) مسافرة ، رح يعمل حفلة !!!

ولا عزاء للتعبانين منا...

This work is licensed under a Creative Commons Attribution-NonCommercial-NoDerivs 3.0 Unported License.