هالبنت وهالشاب

سالتو: "بتحبني؟"

رد وقال: "أكيد"

سالتو: "طيب قديش بتحبني؟"

قال: "بحبك قد البحر وموجاتو

و الطير و غنياتو...

بحبك قد سنين القهر

ولبنان وعذابتو...

قد عمري الضايع  بالغربه

و قد العربي و صراعتو...

بحبك قد قطعة المي

والبنزين وغلاتو...

لك يا ريتو حبي نهر

متل العاصي وهدراتو...

لتسمعي حبي عن بعد شهر...

وتحسي بحلاتو...

حبي إلك متل الجمر..

مدفا بحضن رمادتو..

حبي إلك متل تونس،

حبي إلك متل مصر،

متل الشعب وكراماتو...

بس يا حبي

الوضع ناحرني نحر

فانسي قلبي وتفسيراتو...

خلينا معلقين متل الفكر...

متل الروح...

متل الصوت وصرخاتو...

بلكي شي نهار بنوصل عالبر...

وبيتحقق حلم...

ولبنان بتزبط حوكماتوا..."

        *****

البنت قلبا بيكسر كسر

والبصر بتسود نظراتو...

بتمشي كأنا رايحة تزور الدهر...

والدمع بعينا لمعاتو...

عارفي حبيبا أملو ضعيف..

مبين من كلماتو...

بس هي شايفي التغيير...

و بشعرا عميلعبوا نسماتو...

صارت تعرف إنو رح 

ياخدوا منا كل شي...

إلا الحب وآهاتو...

        *****

 وعلى أمل يوعى هالشعب...

وتتحرك شجاعاتو...

راح يضلن هالبنت وهالشاب 

ناطرين الأمل وحكياتو...

This work is licensed under a Creative Commons Attribution-NonCommercial-NoDerivs 3.0 Unported License.